Psalms 38

1O Yahweh, saannak a tubngaren iti ungetmo; saannak a dusaen iti pungtotmo. 2Ta sinugatnak dagiti panam; ken italtalmegnak dagiti imam.

3Masakit ti entero a bagik gapu iti ungetmo, saan a nasalun-at dagiti tulangko gapu iti basolko. 4Ta linapunosnak dagiti kinadakesko; nadagsenda unay nga awitko.

5Agnunog ken bumangsit dagiti sugatko gapu kadagiti minamaag a basbasolko. 6Nagdumog ken naibabainak iti inaldaw; agdungdung-awak nga agmalmalem.

7Ta inabaknak ti bain, ket agsaksakit ti entero a bagik. 8Agpipikel ken agkakapsutak; agasugak gapu iti ut-ot ti pusok.

9O Apo, maawatam dagiti tarigagay ti kaunggan ti pusok, ket saan a mailemmeng kenka dagiti as-asugko. 10Agkebbakebba ti pusok, agkakapsutak, ken aglidem ti panagkitak.

11Inadaywannak dagiti gagayyem ken kakaduak gapu iti kasasaadko; saandak nga asitgan dagiti kaarrubak. 12Agipakat kadagiti silo para kaniak dagiti agpanggep iti biagko. Agmalmalem nga agsasao kadagiti makadadael ken makaallilaw a sasao dagiti agtarigagay a mangdangran kaniak.

13Ngem siak, kaslaak maysa a tuleng a tao nga awan pulos mangngegna; kaslaak maysa nga umel a tao nga awan pulos maibagana. 14Kaslaak maysa a tao a saan a makangngeg ken awan maisungbatna.

15Awan duadua, nga urayenka, O Yahweh; sumungbatka, Apo a Diosko. 16Ibagak daytoy tapno saandak a pagkakatawaan dagiti kabusorko. No maikaglis ti sakak, agaramidda kadagiti nakaam-amak a banbanag kaniak.

17Ta dandaniakon maitublak, ket kanayon nga agsagsagabaak. 18Ipudnok ti basolko; maseknanak iti nagbasolak.

19Ngem adu dagiti kabusorko, adu dagiti gumurgura kaniak nga awan gapgapuna. 20Sinubadanda iti kinadakes ti kinaimbagko; pabpabasolendak uray no ikalikagumko ti nasayaat.

21Saannak a panawan, O Yahweh; a Diosko, saanka nga umadayo kaniak. Darasem ti umay a tumulong kaniak, O Apo, a salakanko.

22